.
.
လူတစ်ကိုယ် အကြိုက်တစ်မျိုး မို့လားဗျာ။ တချို့က ဗိုလ်ချုပ်ကြီးတွေ၊ သမ္မတကြီးတွေ ဖြစ်ချင်ကြ။ တချို့ကြတော့လည်း သန်းကြွယ်သူဋ္ဌေးကြီးတွေ၊ ကမ္ဘာကျော်သိပ္ပံပညာရှင်ကြီးတွေ၊ ထင်ရှားတဲ့ အနုပညာရှင်တွေ ဖြစ်ဖို့ အိပ်မက် မက်ကြ။ သူ့အတွေးနဲ့ သူပေါ့လေ။
.
.
အဲ.. ရူးတယ်ပဲ ဆိုဆိုဗျာ။ ကျုပ်ကတော့ နောက်ဘ၀ဆိုတာ ရှိခဲ့ရင် တကယ့်အနုပညာရှင်တစ်ယောက်က ဖန်ဆင်းထားတဲ့ စာအုပ်ကလေးတစ်အုပ်ပဲ ဖြစ်ချင်တယ်။ ဒီလောက်ပါပဲ။ သိပ်လည်း လောဘမတက်ပါဘူး။
.
.
ဘာ.. ။ ကျုပ်ကို စိတ်မမှန်သလိုတော့ မပြောပါနဲ့ဗျ။ ခင်ဗျားပဲ စဉ်းစားကြည့်စမ်းပါ။ ကျုပ်သာ စာအုပ်ကလေးတစ်အုပ် ဖြစ်နေပြီး ကျုပ်ကို ဘာသာစကားအမျိုးမျိုးနဲ့ ပြန်ဆို၊ ကမ္ဘာအနှံ့ထုတ်ဝေထားတယ်လို့ လေ။ စာအုပ်စာပေ လူ့မိတ်ဆွေဆိုပြီး ကမ္ဘာ့လူသားတွေရဲ့ ဖတ်ရှုတာကို ခံရမယ့် အဖြစ်ကိုတွေးပြီး ရင်တွေခုန်လိုက်တာ။ ခေါင်းအုံးအောက်မှာ၊ ရင်ဘတ်ပေါ်မှာ၊ စားပွဲဘေးမှာ… ကျုပ်ကိုထားကြပြီး ကျုပ်ဆီကရမယ့် အတွေးအခေါ်တွေ၊ ဗဟုသုတတွေ၊ မျှော်လင့်ချက်တွေ၊ အကြံအစည်စိတ်ကူးတွေနဲ့ စာဖတ်သူတွေ အသိအမြင် လင်းပွင့်သွားမယ်လို့ ခင်ဗျား တွေးကြည့်လိုက်စမ်းပါ။
.
.
ကျုပ်အတွက် ခင်ဗျားတို့ အော်အော်နေတဲ့ GREEN EFFECT ဆိုတာကြီးလည်း မစိုးရိမ်ရတော့ဘူး။ မီး ခဏ ခဏ ပျက်မှာလည်း မပူရတော့ဘူး။ တွေ့ရာပုဒ်မနဲ့ ထောင်သွင်းခံရမှာလည်း မကြောက်ရတော့ဘူး။ စိတ်ဖိစီးမှုတွေကို ခံစားနေစရာလည်း မလိုဘူး။ ပဋိပက္ခတွေအတွက် ရင်တုန်နေစရာလည်း မလိုတော့ဘူး။ အစုလိုက်၊ အပြုံလိုက် သတ်ပွဲတွေ၊ ခရစ်စမတ်မီးရောင်တွေအစား ဗုံးဆံ၊ ကျည်ဆံတွေ၊ ရထားလမ်းတွေ၊ တံတားတွေ မိုင်းခွဲဖျက်ဆီးကြတဲ့ အနိဋ္ဌာရုံတွေကို ကျုပ် မကြည့်ရက်ရက် မျက်နှာလွှဲစရာလည်း မလိုတော့ဘူး။ အဲဒါတွေနဲ့တင် ကျုပ်အတွေးကို ကျုပ် ကြိုက်နေပြီ။
.
.
ဒီမှာကိုယ့်လူ။ သွေးညှိနံ့တွေ၊ ရန်လိုမှုတွေ၊ တယူသန်စိတ်တွေ၊ အာဃာတတွေ၊ ခြစားမှုတွေနဲ့ ရှုပ်ထွေးပွေလီလှတဲ့ လောကကြီးမှာ လူပြန်ဖြစ်ရမယ့်အစား စစ်မှန်တဲ့ အနုပညာရှင်တစ်ယောက်ရဲ့ ရင်ကဖြစ်တဲ့ စာအုပ်ကလေးအဖြစ် ကြီးပျင်းရတာကိုပဲ ပိုပြီး ဘ၀င်ကျမိတယ်။ ဘာလို့ဆို အနည်းဆုံးတော့ ကျုပ်ရဲ့ကိုယ်ပွားတစ်ယောက်ဟာ ကမ္ဘာ့တစ်နေရာက စာအုပ်စင်မှာ၊ စာကြည့်တိုက်မှာ၊ ဒါမှမဟုတ်… စာဖတ်သူထံမှာ ထာဝရ ရှင်သန်နေမှာမို့လေ။ အဲဒါ ကျုပ်ရဲ့ အာသီသနဲ့ ဆန္ဒပါပဲ။ လွတ်လပ်စွာ သဘောကွဲလွဲခွင့်ရှိပါတယ် မိတ်ဆွေကြီး။ ကဲ… ခင်ဗျားကရော…။
ဗိုရဲ
0 comments:
Post a Comment
Comment လေးတစ်ကြောင်းဟာ စာရေးသူအတွက်အားဆေးပါ .. ကျေးဇူးပြုပြီး အခု Post နဲ့ပတ်သက်လို့ စာဖတ်သူရဲ့ အမြင်ကိုလည်း မျှဝေခဲ့ပါဦး ...